يا صبية مالها عيونك
زعلانة لية وبالك مش رايق
اوعي الدمعة تنزل على جفونك
ده القمر مينفعش يضايق
اوعي تفقدي ثقتك بنفسك
وتسيبي الحزن يسكن ملامحك
اتخلقتي رقيقة بطبعك
كلمة حلوة تطيب خاطرك وتنسيكي سبب زعلك
وقت الشدة بميت راجل قوية وصامدة
تتحملي الضغط وتشيلي المسئولية
وعمرك ما تطلبي المساعدة
رافضة للهزيمة و الاستسلام
بتسامحي فأي حاجة إلا أن كرامتك تتهان
كوني رحيمة بنفسك
انسي حزنك ودعي يأسك
اللي سابك انسيه
وامحي من ذكرياتك لياليه
وافتكري أن العمر مرة واحدة هتعيشيه
عادي لما نتوجع و نتألم
ما هو احنا مخلوقين نتعلم
بس اكيد بكرا الفرح
هيجي عليكي يجري ويسلم
الحياة كلها محطات
محطة وجع محطة فراق ومحطة بكا وأهات
واخرهم محطة العوض عن كل اللي فات
بنوصلها واحنا اقوي وانضج من زمان
فاهمين الدنيا وشايفنها بكل الالوان
واثقين بالله و على درجة عالية من الايمان
اصبري وارضي ومتنسيش أن كلنا فـ امتحان
محدش يستاهل زعلك يا وصية الرسول
اضحكي وعيشي سنك وخلي طموحك يطلع للنور
ربنا مش هينسى تعبك ووجعك وهيجعل قلبك مجبور
حاولى وجربي واوعي حد يحبطك
كل محاولة ناجحة كانت أو فاشلة هتعلمك
كل تجربة لطريق النجاح بتأهلك
بكرا تلاقي اللي يشبهك
ويستاهل قلبك و محبتك
عيونك تضحك لرؤيته
والقلب يشتاق لابتسامته وضحكته
ويكون ليكي عوض عن كل اللى روحك عاشته
شوفي بكرا بشكل جديد
شكل بيضحك شكل سعيد
شكل يعيد للقلب نبضاته
ويسكن الفرح بين دقاته
اهتمي بنفسك وخليكي عافيه
اهتمي بنفسك يأجمل صبية
لـ هدير أسامة سيد
مجلة شعراء العصر الحديث 